Enzo (Vincenzo) D’Orsi, «’A Festa» (poema scritto per celebrare la festa di San Bartolomeo Ap., Santo patrono di Pellare [SA])
Tant’anne arreto, a Péllare,
cunfromme era trasuto ‘o mese ‘Austo,
tutte s’arrepusàvano
e campavano ‘a vita cu cchiù gusto.
A Luglio, dopp’ ‘o Càrmene,
scugnanno ‘e spiche sott’ ‘o sole ardente,
s’era cugliuto a tòmmole
‘o frutto d’e ffatiche e d’e ssemente;
po’ ‘e vvigne sciasciàvano,
chiene ‘e cecale e arille cantature,
e ll’uva, sott’ ‘e pàmpane,
cacciava già ciert’àcene mature.
For’ ‘e llogge, asseccàvano
Piatte ‘e cunzerva e fiche ‘int’ ‘e spaselle;
smanianno p’ ‘o càuro,
se spuntàvano ‘o busto ‘e ppacchianelle.
Eppure, ‘int’a chell’aria
bafogna e addubbecosa ch’addurmeva,
‘e ggente freccecàvano,
tenevano – che ssà – comm’a na freva.
Quant’accunte pigliàvano
Scarpare sartutelle e cuseture!
Cchiù ch’a Natale e Pasqua,
mo’ tutte se sentevano signure.
S’appriparava ‘a Cchiesa,
sott’ ‘e ffeste d’ ‘o Santo Prutettore:
ferze ‘e velluto e spingole.
Ch’artista, chillu masto apparatore!
Mmiez’ ‘e ccanèle, ‘a statua,
ca pure si è nu Santo a mmiezzo busto,
appassa – p’ e’ miracule –
pure a nu Santo ca murette arrusto.
San Bartummeo ll’Apostolo,
cu ‘e ccurtelle fui, vivo, scurtecato:
e vuo’ can un s’ ‘a mmèreta
na festa ‘e divuzzione e d’allegria.
veneva pure ‘o Vescovo
p’ ‘a funzione solenne e l’omelia:
e quanno ‘a copp’ ‘o pulpito
sentevamo ‘e cuntà vita e turture
‘e chillu Santo Martire,
a ggente ne ‘nzuppava muccature!
Sàglieva ll’Ostenzòrio,
cadeva tutt’ ‘a cchiesa addenucchiata,
Lisandro, ‘ncopp’ a ll’òrgano,
sunava na rumanza d’ ‘a Traviata.
Tracche, campane, mùseca,
e finalmente asceva ‘a prucessione:
na quinnecina ‘e statue,
e po’ San Bartummeo sott’ ‘o ‘mbrellone;
ogne ttanto ‘o scennevano
pe’ l’appennere ‘ncuollo solde e vute,
e chi cercava grazie
p’ ‘a bona annata, e chi bona salute.
Fernuto ‘o giro, all’ùrdemo,
a’ n’ferta ‘e mastu Tore ‘o tartararo:
tre masche – Dio ce libbera –
ca tremmàvano ‘e lastre e ‘ò campanaro.
‘A sera, s’accurzàvano
e’ bbanche cu ll’antrìte a cu ‘e ggelate,
fin’a quanno ‘o sipàrio
s’aizava nnant’ ‘a folla affatturata:
allicchetto, ‘o spettàculo,
e quanta sbattimane e che rresate!
Ma po’ ferneva ll’opera,
cu ‘e fuoche artificiale e cu ‘e ggranate.
Stunate, allère e sàzie,
tuttequante se jèvano a cuccà:
nu cupierchio ‘e silenzio
cadeva ‘ncuollo a ‘sta felicità.
Vincenzo D’Orsi
Poesia pubblicata su “La Voce di Pellare”, edizione Gennaio 1974 – Numero Unico. Direttore Responsabile: Giuseppe Stifano; Redattore: Don Antonio Rienzo. Copia de “La Voce di Pellare” conservata e gentilmente concessa dall’arch. Maurizio Pilerci.
-------------------------------------------------------------------------------------------------- Traduzione di alcuni termini presenti nella poesia Scugnanno: [tr.] Trebbiando Sciascìavano: [tr.] Poltrivano Bafogna: [tr.] Afosa Freccecavano: [tr.] Si agitavano Accunte: [tr.] Clienti Tracche: [tr.] Petardi Masche: [tr.] Mortaretti S’accurzàvano: [tr.] S’affollavano di clienti Granate: [tr.] Mortaretti luminosi
