Enzo D’Orsi, “Paese Mio”: il Cilento in versi del poeta pellarese
Paese mio, Paese d’’o Ciliento,
che guarde ‘o mare ‘a coppa ‘na muntagna
‘a nustalgia che tengo ‘e ‘sta campagna
me tarla ‘o core peggio ‘e nu turmiento
ca si ‘nce stanno ancora tutt’ ‘e vigne,
e’ fravole ‘int’ ‘o bosco d’ ‘e castagne
pacchianelle cianciose, vie sulagne
e nive ‘ncoppa all’albere d’ ‘e pigne
tu sì nu paraviso a primmavera
quanno se zappa ‘a terra e ‘a terra addora,
quanno ‘o sole, che a luglio ‘e spiche ‘ndora
te vene ammaturà perzeche e pere;
quanno ‘e ghiurnate nun so’ cchiù bafogne,
ch’ arriva ll’uva a cuofene da ‘e vigne,
e se vanno ‘a stipà ‘ncopp’ e seppigne
spaselle ‘e fiche, e sporte cu e’ ccutogne,
Paese mio te penso!
E tengo ‘nnante tutt’ e’ muntagne, e case, e’ viche,
‘a gente faticatora semplice e nnucente,
‘a chiesa, e’ feste, ‘e prucessione, e’ Sante…
Pover’ a me, quant’ anne so’ passate
ca vaco spierto, senza truvà abbiento!
E forse a ‘stu paese d’ ‘o Ciliento
‘e cose e ‘a vita nun se so’ cagnate,
primma ca sponta ‘o sole a matutino,
se parte p’ ‘e campagne ‘o parulano,
‘a zappa ‘ncuollo e ‘o panariello ‘n mano
cu na panella e na butteglia ‘e vino.
E ‘a sera, quanno sanano ‘e campane,
ca tornano da ‘e vigne ‘e zappature
e d’ ‘a muntagna scènneno ‘e pasture
cu ‘e morre ‘e crape, ‘o ciucciariello e ‘o cane,
‘e cummarelle lavano ‘a ‘nzalata
nnant’ e ffuntane e ghienncono ‘e llangelle,
pe’ tramente ‘int’ ‘e case, ‘e vicchiarelle
sosciano ‘o fuoco sott’ a na pignata.
Ncielo, addo’ ‘e primme stelle so’ già appese,
e addo’ volano e’ sguincio e spurtigliune,
saglie e se spanne ‘o fumo d’ ‘e rezzune
‘a tutt’ ‘e cemmenenre d’ ‘o paese;
sulo ‘na casa. Affianco ‘o campanaro,
è sempre scura, sempre fredda e muta
va trova quant’ ardica ch’è crisciuta
nnant’ ‘e porte d’ ‘astalla e d’ ‘o cellaro!
P’ ‘e senghe d’ ‘e feneste rebbazzate
Inutilmente ‘o sole spercia e trase
‘na casa morta, mmienz’ all’ ati case,
cu lastre rotte e mura stucanate.
Ma forse ancora mò, sott’ ‘a pennata
tornano ‘e rundinelle a primmavera
l’ ellera cresce, e saglie p’ ‘a ringhiera
d’ ‘o balcunciello, ‘nfn’ ‘a petturata.
Io no, nun torno `int`a `sta casa morta:
che torno a fa’ si nun ce trovo Mamma?
Chi veglia, chi suspira, chi me chiamma,
e chi m’aspetta, chi m`arape `a porta?
M’aspetta forse ‘o lietto addò so’ nato
e addò ca m’hann’ ‘a stennere addurmuto,
m’aspettano ‘na croce e nu tavuto,
e avarraggi’ ‘a turnà, nu juorno o n’ato.
Ogge o dimane, nun me ‘mporta, tanto,
o’ nutaro m’ha fatto ‘o testamiento.
Paese mio, paese d“o Celiento,
astipame nu pizzo a `o campusanto!
Vincenzo D’Orsi (noto come Enzo), nacque a Pellare da una famiglia originaria del Comune di Valle dell’Angelo. Laureato in ingegneria si trasferì a Venezia. Nonostante la distanza, l’ingegnere-poeta non dimenticò mai la terra natia. Infatti, pur prediligendo linguisticamente il napoletano invece che il vernacolo cilentano, celebrò nei suoi componimenti poetici i profumi, i colori, le persone e le abitudini di quello che era il luogo del cuore. Nel 1922 pubblicò i suoi primi versi Sciure e pensieri, nel 1949 la raccolta di 26 componimenti poetici Paese mio, nel 1954 pubblico la raccolta di versi dialettali Fronne verde, nel 1969 Cielo turchino, nel 1983 O canario. Inoltre, collaborò al settimanale La vela, dove pubblicò vari articoli di saggistica.
https://www.youtube.com/watch?v=uJSPC8B0Qdc